Aёл киши эрнинг топиб келганига рози бўлиб, қаноат қилиши. Эрнинг кўчадаги иши эса уйдаги тинчлик-осойишталикка боғлиқ

Aёл киши эрнинг топиб келганига рози бўлиб, қаноат қилиши.
Эрнинг кўчадаги иши эса уйдаги тинчлик-осойишталикка боғлиқ.

Аллоҳ таоло берган насибага рози бўлиш керак. Қаноат бугунг кунда жуда ҳам ноёб нарса бўлиб қоляпти. Аёл эрининг топганига Аллоҳдан баракот тилаб, шукр қилиши, тежамкорлик билан сарфлаши керак. Набий алайҳиссалом «Бандага шукр қилмаган одам Аллоҳга ҳам шукр қилмайди», деганлар. Аёл ношукр бўлса, эрига ҳам миннатдорчилик билдира олмайди, Аллоҳга ҳам шукр айта олмайди. Ҳадиси шарифларда ўзимиздан бойларга эмас, ўзимиздан камбағалларга қараш буюрилган. Эрининг топганига ношукрлик қилаётган аёл атрофга бир назар ташласин. Бошқа оилалардаги аёллар, ўзи тенгилар, маҳалладошлари, қўни-қўшнилари ёки синфдошлари ёки опа-сингиллари қандай яшаяпти? Аллоҳ таоло шукр қилсангиз, зиёда қиламан деб марҳамат қилади. Шукр қилмасак, бунинг акси бўлади. Шунинг учун аёл эрининг ҳаққига доим дуода бўлиши, топганига хайр-баракот тилаши, «кўпроқ топиб келинг» дейиш ўрнига «оз бўлса ҳам, фақат ҳалол йўл билан топиб келинг» дейиши керак.  

Аёл киши келин бўлиб тушган хонадонига келин эмас, қиз бўлиб бориши, шу оиланинг аъзосига айланиши керак. Аммо шариатнинг чегарасидан чиқиши мумкин эмас. Бунга аввало унинг ўзи, қолаверса эри ҳам қатъий риоя қилиши керак. Бу оилада, яъни эрининг қариндошларидан ким маҳрам, ким номаҳрамлигини аниқлаб олиб, шунга яраша иш тутиши керак. Эрининг дўстлари, таниш-билишларига ҳам худди шу асосда муносабат қилинади. Аёл киши эрининг дўстларига нотанишдек бўлиши лозим. Эрининг дўстлари билан улфатлардек гаплашадиган аёл эрида шубҳа уйғотади. Аёл киши гўзаллиги билан эрига фахрланмаслиги керак, айни пайтда эрининг хунуклиги ёки камбағаллигини юзига солиб, уни ерга урмаслиги керак.  
Бугунги суҳбатга оид охирги ҳақ – аёлнинг фарзандларига раҳм қилишидир. Аслида аёл киши эркак кишидан кўра меҳрибон, мулойим бўлади. Аммо шундай аёллар борки, уларнинг эрига ёки фарзандларига қўпол муомаласини кўриб, ёқангизни ушлайсиз. Ота ҳам, она ҳам фарзандларини уриши, лаънатлаши керак эмас, чунки бу нарса фарзанднинг тарбияси ва руҳиятига ниҳоятда салбий таъсир қилади.  

Эркак киши кўчадан ризқ-рўз топиб келади. Аёл буни Аллоҳнинг неъмати деб қабул қилиши ва тўғри тасарруф қилиши керак. Аёл киши хонадоннинг файзидир, уйнинг тинчлигидир. Эрнинг кўчадаги иши эса уйдаги тинчлик-осойишталикка боғлиқ, биродарлар. Уй нотинч бўлса, эркак одам кўчада тинч юра олмайди, иши юришмайди. Эрнинг баракасини уйидаги ношукр аёл ўчиради. Аёл эрига қандай муомала қилса, шу уйда катта бўлган қизлар эртага ўзига ҳам шу муомалани қилади. Қизларининг кўз ўнгида эрига ўшқираётган, эрига жанжал қилаётган аёллар буни яхши билиб қўйсин. Бир кун келиб, қизини ҳам шу аҳволда кўрса, бировни айблаб юрмасин. Қиз бола онасидан андоза олиб яшайди. Ўғил бола отасидан андоза олиб яшайди. Аёлнинг озгина ақли бўлса, ҳеч қачон болалар олдида жанжал қилмайди, эрига итоат қилади. Нима жанжал, нима гапи бўлса, эри билан ёлғиз гаплашиши керак. Зинҳор базинҳор болаларнинг нозик кўнглини синдириш керак эмас.  
Аллоҳ таоло барча оилаларимизни фароғат қасрига, ҳаловат бўстонига айлантирсин, оилаларимизни ислоҳ қилиб, жамиятимизни фаровон айласин!