ЎЛИМ ВАҚТИДА ПЕШОНАДАН TEP ОҚИШИ

Гўзал хотима аломатларидан бир муҳим аломат, вафот этаётган кишининг пешонасидан тер оқишидир. Ўлим вақтида пешонадан тер оқиши гўзал хотима аломати ва маййит Аллоҳнинг ҳузурида ҳурматга лойиқлиги белгисидир. Чунончи, Бурайда розияллоҳу анҳудан ривоят қилинадики, Расулуллоҳ соллаллоҳу алайҳи васаллам шундай марҳамат қилдилар:
«Албатта, мўмин банда пешонасида тер ила вафот этади». («Сунани Термизий», 982. «Сунани Насоий», 1829. «Сунани ибн Можа», 1452. «Муснади Аҳмад», 23014. «Саҳиҳи ибн Ҳиббон», 3011)

Ривоятларда келадики, Бурайда розияллоҳу анҳу ўлим тўшагида ётган бир касални зиёрат қилиш учун Хуросонга бордилар. Унинг пешонасидан тер оқаётганини кўриб, ўша ерда бу ҳадисни айтиб берганлар. Бир ривоятда келадики, Алқама розияллоҳу анҳу бир куни бир кишининг ҳузурига бордилар. У ўлим арафасида эди. Унинг пешонасидан тер оқаётганини кўриб кула бошладилар. Язид ибн Авс: «Сиз нега куляпсиз? » – деб сўради. Шунда у киши: «Мен Абдуллоҳ ибн Масъуд розияллоҳу анҳудан эшитганман. Расулуллоҳ соллаллоҳу алайҳи васаллам: «Мўминнинг руҳи пешонасидан тер оқаётган ҳолда чиқади», – деганлар. («Мусаннафи Ибн Абу Шайба», 6772)

Ўлим вақтида пешонадан нега тер оқади?

Бу ерда бир нарсани баён қилиш ўринли бўладики, уламолар: «Мўмин банданинг пешонасидан ўлим вақтида нега тер оқади?» дея баҳс қилдилар. Бу борада бир неча сўзлар айтилган:
1. Аллома Ибнул Малак: «Мўминга гуноҳлари ювилиши учун ўлим шиддати юз беради. Агар гуноҳи бўлмаса, унинг даражалари юксалишига сабаб бўлади», – дедилар.
2. Бир неча уламолар унинг бир ажиб сабабини ҳам шундай ёзганлар: «Мўмин банданинг пешонасидан тер оқишининг сабаби шуки, у ўлим вақтида гуноҳлари сабабли Аллоҳдан уялади. Мана шу шарму ҳаёси туфайли пешонасидан тер оқади. Бунинг аксича, кофир уялмайди. Шунинг учун ундан тер оқмайди».
3. Бу борада яна шундай ҳам дейилган: «Дарҳақиқат, бу ҳадисдан мақсад шуки, мўмин бандага ўлим вақтида жуда кам озор бўлади. Бор-йўғи шу даражада озор бўладики, унинг сабабидан пешонасидан тер оқади, холос». («Файзул Қодийр», 6/329. «Хошиятус Синдий аълан Насоий», 4/6)

“Гўзал хотима” китобидан.