ИСТИҚЛОЛ — УЛУҒ НЕЪМАТ ВА ШУКР АЙЁМИ

Аллоҳ таолога ҳамду санолар бўлсинки, бугун юртимизда тинчлик ва осойишталик, миллатлараро тотувлик ҳукм сурмоқда. Мустақиллик — халқимиз учун берилган улуғ неъматлардан бири бўлиб, уни қадрлаш, асраш ва шукрини адо этиш ҳар бир инсоннинг эзгу бурчидир.

Истиқлол бизга нафақат эркин ва мустақил ҳаёт кечириш имконини, балки ўзлигимизни, миллий ва маънавий қадриятларимизни, асрлар давомида шаклланган бой диний-маданий меросимизни тиклаш ва авлодларга етказиш имкониятини ҳам берди.

Динимизда неъматларга шукр қилиш алоҳида улуғланган. Қуръони каримда: «Агар шукр қилсангиз, албатта, сизларга зиёда қиламан» (Иброҳим сураси, 7-оят) деб марҳамат қилинган.

Тинчлик — инсон ҳаётидаги энг буюк неъматлардан биридир. Тинч юртдагина инсон бемалол меҳнат қилади, фарзанд тарбиялайди, илм олади, ибодатини адо этади ва келажакка эзгу ниятлар билан қадам қўяди. Шунинг учун ҳам юртимиздаги тинчлик ва хотиржамликни асраш ҳар биримизнинг муқаддас вазифамиздир.

Пайғамбаримиз Муҳаммад соллаллоҳу алайҳи васаллам инсонларни ўзаро меҳр-оқибатли, бир-бирига яхшилик қилувчи ва жамият тинчлигига ҳисса қўшувчи бўлишга чорлаганлар.

Истиқлол йилларида юртимизда диний-маърифий соҳада ҳам муҳим ишлар амалга оширилди. Масжидлар обод қилинди, диний таълим ва маърифат масалаларига эътибор кучайди, буюк алломаларимиз — Имом Бухорий, Имом Термизий, Имом Мотуридий, Абу Али ибн Сино, Беруний каби аждодларимизнинг бой илмий ва маънавий мероси янада кенг ўрганилмоқда. Бу эса ёш авлодни миллий ўзликни англаш, илм-маърифатга интилиш ва эзгуликка чорлашда муҳим аҳамият касб этмоқда.

Шу муборак айёмда Аллоҳ таолодан юртимиз тинчлиги ва халқимиз осойишталигини янада зиёда қилишини сўраймиз. Хонадонимиздан файзу барака, қалбларимиздан меҳр-оқибат, юртимиздан тинчлик ва хотиржамлик аримасин. Фарзандларимиз солиҳ ва солиҳа, илмли ва маърифатли инсонлар бўлиб камол топсин.

Аллоҳ таоло Ўзбекистон диёрини тинч ва обод, халқимизни аҳил ва ҳамжиҳат қилсин. Юртимизни турли офат ва балолардан асрасин, барчамизга Ватанимиз равнақи йўлида ҳалол ва баракали меҳнат қилишни насиб этсин.

Мустақиллигимизнинг 35 йиллиги муборак бўлсин!
Истиқлолимиз абадий, юртимиз тинч, халқимиз фаровон бўлсин!
Аллоҳ таоло Ватанимиз ва халқимизни ўз паноҳида асрасин! Омин