Сийрат

1. Набий алайҳиссаломни барча инсонлардан афзал билиш.
Яъни, ҳар бир мусулмон киши Муҳаммад (с.а.в.)ни инсониятнинг энг афзали, деб эътиқод қилиши лозим.
2. Набий алайҳиссалом ҳақларида доимо одобга риоя қилиш.
3. У зотнинг берган хабарларини тасдиқлаш.
Расулуллоҳ соллаллоҳу алайҳи васалламнинг берган хабарларини тасдиқлаш ва у зотни ёлғон гапиришдан пок, деб билиш иймон рукнларидан ҳисобланади.
4. У зотнинг кўрсатмаларига эргашиш.
Расулуллоҳ соллаллоҳу алайҳи васалламга муҳаббатли бўлиш  у зотнинг феъллари ва сўзларига эргашишни тақозо қилади. Зеро у зотга эргашиш иймоннинг асли экани ва жуда улкан бахту-саодатга сабаб бўлиши Қуръони каримда баён қилиб қўйилган:
قُلْ إِنْ كُنْتُمْ تُحِبُّونَ اللَّهَ فَاتَّبِعُونِي يُحْبِبْكُمُ اللَّهُ وَيَغْفِرْ لَكُمْ ذُنُوبَكُمْ وَاللَّهُ غَفُورٌ رَحِيمٌ
“Сен: "Агар Аллоҳга муҳаббат қилсангиз, бас, менга эргашинг. Аллоҳ сизга муҳаббат қиладир ва сизларнинг гуноҳларингизни мағфират қиладир!, деб айт” деб марҳамар қилинган.
5. Пайдо бўлган масалаларни у зотнинг суннатларига асосан ҳал қилиш.
6. У зотни ҳимоя қилиш.
Расулуллоҳ соллаллоҳу алайҳи васалламни ҳимоя қилиш у зотга бўлган муҳаббатнинг энг улкан аломатларидан ҳисобланади. Тарих китобларида саҳобаларнинг у зотни душман ўқларидан таналари билан тўсганлари баён қилинган. У зот вафотларидан кейин эса душманларнинг бўҳтонларидан у зотнинг пок сийратларини ҳимоя қилиш ҳар бир мусулмонга лозим бўлади.
7. У зотнинг суннатларини ҳимоя қилиш.
Расулуллоҳнинг суннатларини ҳимоя қилиш, деганда уларни ёдлаш ҳамда бузғунчи ва жоҳилларнинг нотўғри талқин қилишларига қарши курашиш тушунилади.
8. У зотнинг суннатларини ёйиш.
Расулуллоҳ соллаллоҳу алайҳи васалламнинг суннатларини инсонларга таълим бериб, уларнинг ёйилишига хизмат қилиш, у зотга бўлган муҳаббат ва эҳтиромнинг юксак намунаси ҳисобланади.

Аллоҳ таоло барчамизни Мавлуд ойида Пайғамбаримиз соллаллоҳу алайҳи васалламга янада кўпроқ саловатлар айтиб юришимизни насиб этсин! Омин!